चाळीसगाव : प्रतिनिधी
शेतात सालदारकी करणाऱ्या कुटुंबातील १० वर्षाआतील चार सख्ख्या भावंडांचा शेताजवळच असलेल्या केटी वेअरमध्ये बुडून मृत्यू झाला. अंगावर शहारे आणणारी ही घटना पिंपरखेड, ता. चाळीसगाव येथे रविवारी सायंकाळी घडली. मृतांमध्ये तीन बालिका व त्यांच्या भावाचा समावेश आहे. रक्षाबंधनाच्या आदल्या दिवशी भावा-बहिणींचा मृत्यू ओढवल्याने हळहळ व्यक्त होत आहे. शिवांजली सभानिया आर्य (६ वर्षे रोशनी सुभानिया आर्य (९ वर्षे), आराध्या सुभानिया आर्य (४ वर्षे), आर्यन सुभानिया आर्य (५ वर्षे) अशी बुडून मरण पावलेल्या भावंडांची नावे आहेत.
सविस्तर वृत्त असे कि, पिंपरखेड गावालगतच उदय सुधाकर अहिरे यांचे शेत आहे. या शेतात सेंधवा येथील सुभानिया देवचंद आर्य हे पत्नीसह शेतात सालदारकी करतात. त्यांना पाच मुली व मुलगा असा परिवार. यापैकी चार मुली व मुलगा हे सायंकाळी शेताजवळच असलेल्या केटी वेअर परिसरात खेळत होती. त्यावेळी यापैकी तीन बहिणी क भाऊ बुडत असल्याचे पाहून त्यांच्यासोबत असलेल्या मोठ्या बहिणीने आरडाओरड केली; त्यावेळी हा प्रकार उघडकीस आला. या बालकांचे मृतदेह रात्रीच ग्रामीण रुग्णालयात आणण्यात आले. तिथे वैद्यकीय अधीक्षक डॉ. मंदार करंबेळकर यांनी शवविच्छदन केले. काही तासांपूर्वी शेतात बागडणाऱ्या या मुलांचे मृतदेह पाहून कुटुंबीयांनी एकच आक्रोश केला. चाळीसगाव ग्रामीण पोलिस ठाण्यात अकस्मात मृत्यूची नोंद करण्यात आली आहे. पोलिस निरीक्षक संदीप पाटील, उपनिरीक्षक लोकेश पवार यांनी घटनास्थळी तातडीने पोहोचले.
