जळगाव : प्रतिनिधी
सायकलने शिकवणीला जात असलेल्या तनिष्का परेश नेवे (१२, रा. भोईटे नगर) या विद्यार्थिनीला कारने धडक दिल्यामुळे ती गंभीर जखमी झाली. तिच्यावर खासगी रुग्णालयात अतिदक्षता विभागात उपचार सुरू आहेत. ही घटना शनिवारी (१० ऑगस्ट) गुड्डुराजा नगरजवळ झाली. अपघातानंतर कारचालक न थांबता पसार झाला.
सविस्तर वृत्त असे कि, व्यावसायिक परेश सुधाकर नेवे यांची इयत्ता सातवीमध्ये शिक्षण घेत असलेली मुलगी तनिष्का ही शनिवारी सायकलने क्लासला जात होती. त्या वेळी एका कारने तिच्या सायकलला जोरदार धडक दिली. यात तिच्या डोक्याला जबर मार लागण्यासह डोळ्ळ्यांच्या वरील हाडाला टीच गेली आहे. या सोबतच हाता-पायाला गंभीर दुखापत झाली आहे. धडक दिल्यानंतर कारचालक तेथे न थांबता कारसह पसार झाला. घटनास्थळाजवळील एका दुकानदाराने धाव घेत विद्यार्थिनीच्या घरच्यांना याविषयी माहिती दिली. त्या वेळी तिच्या कुटुंबीयांनी तिला आकाशवाणी चौकातील खासगी रुग्णालयात दाखल केले.
