जळगाव : प्रतिनिधी
चुकीच्या दिशेने (राँग साईड) जाणाऱ्या ट्रकने दुचाकीला धडक दिल्यामुळे कामावरून घरी परतणारे योगेश भास्कर ढाके (४५, रा. सदोबा नगर) हे ठार झाले. हा अपघात शुक्रवारी (९ ऑगस्ट) रात्री महामार्गावर तरसोद ते नशिराबाद दरम्यान झाला.
मिळालेल्या माहितीनुसार, जळगाव शहरातील सदोबा नगरातील रहिवासी योगेश ढाके हे नशिराबाद येथील एका पेट्रोलपंपावर कामाला होते. शुक्रवारी रात्री काम संपल्यानंतर ते दुचाकीने (क्र. एमएच १९, डीपी ४६६०) घरी परतत होते. नशिराबादपासून काही अंतरावर आल्यानंतर समोरून राँग साईडने एक ट्रक (क्र. एमएच १८, बीजी २९३७) नशिराबादकडे जात होता. या ट्रकने दुचाकीला धडक दिल्याने ढाके हे बाजूला फेकले गेले व ते ठार झाले. अपघातानंतर ट्रक मधोमध थांबला होता. त्यामुळे रहदारीलादेखील अडथळा झाला. घटनेची माहिती मिळाल्यानंतर नशिराबाद पोलिस ठाण्याचे सहायक पोलिस निरीक्षक आसाराम मनोरे, पोहेकॉ शरद भालेराव, गिरीश शिंदे, संजय महाजन, पोकों सागर भिडे हे घटनास्थळी पोहोचले. त्यांनी ढाके यांना शासकीय वैद्यकीय महाविद्यालय व रुग्णालयात दाखल केले. तसेच क्रेन बोलवून दुचाकी काढली व ट्रक रस्त्याच्या बाजूला केला.
