जळगाव : प्रतिनिधी
रस्त्यावर शतपावली करत असलेल्या एका महिलेच्या गळ्यातून दुचाकीवरून आलेल्या चोरट्यांनी १ लाख रुपये किमतीचे सोन्याचे मंगळसूत्र चोरून नेल्याची घटना सोमवारी रात्री १०:३० वाजता घडली आहे. याप्रकरणी शहर पोलिस ठाण्यात अज्ञात दोन जणांवर गुन्हा दाखल करण्यात आला आहे.
सविस्तर वृत्त असे कि, उषा शशिकांत हिंगोणेकर (वय ५७ रा. निर्मला रेसिडेन्सी, गुड्डूराजा नगर) ही महिला आपल्या कुटुंबासह वास्तव्याला आहे. सोमवारी रात्री जेवण झाल्यानंतर त्या आपल्या घराच्या आवारात रात्री १०:३० वाजता शतपावली करीत असताना त्यांच्या मागून एक इसम चालत आला. त्याने त्यांच्या गळ्यातून सोन्याची पोत ओढून घेतली. लागलीच पुढे दुचाकीवर उभ्या असलेल्या एका दुचाकीवरून दोन्ही चोरटे पसार झाले. ही घटना घडल्यानंतर महिलेने आरडाओरड केली. मात्र, तोपर्यंत चोरटे मुद्देमाल घेऊन पसार झाले. याप्रकरणी त्यांनी शहर पोलिस ठाण्यात ठाण्यात धाव घेऊन तक्रार दिली. त्यांनी दिलेल्या तक्रारीवरून अज्ञात दोन जणांवर गुन्हा दाखल करण्यात आला आहे. पुढील तपास पोहेकों योगेश पाटील हे करीत आहे.
