जळगाव : प्रतिनिधी
तालुक्यातील दापोरा येथे कर्जाच्या जाचाला कंटाळून दशरथ भीमराव तांदळे (वय ५२, रा. दापोरा) या शेतकऱ्याने गळफास घेऊन, आत्महत्या केल्याची घटना मंगळवारी दुपारी १२ वाजता उघडकीस आली. एमआयडीसी पोलिस ठाण्यात ‘अकस्मात मृत्यू’ची नोंद आहे.
मिळालेल्या माहितीनुसार, तांदळे हे पत्नी व मुलासोबत दापोरा येथे वास्तव्याला होते. दुपारी घरी कोणीही नसताना त्यांनी राहत्या घरातील पंख्याला गळफास घेतला. त्यांच्या मुलाने दरवाजा उघडल्यानंतर प्रकार उघडकीस आला. तांदळे यांना जिल्हा शासकीय वैद्यकीय महाविद्यालय व रुग्णालयात दाखल करण्यात आले. डॉक्टरांनी त्यांना मृत घोषित केले. त्यांच्या पश्चात पत्नी अनिता तांदळे, मुलगा, विवाहित मुलगी असा परिवार आहे. ते दापोरा विविध कार्यकारी सहकारी सोसायटीचे संचालक तुकाराम भीमराव तांदळे यांचे भाऊ होत. दरम्यान, वाढते कर्ज आणि त्या तुलनेत शेतीतून कमी मिळणारे उत्पन्न याला कंटाळून आत्महत्या केल्याचे नातेवाईकांनी सांगितले.
