चाळीसगाव : प्रतिनिधी
चाळीसगाव मालेगाव रोडवरील हॉटेलजवळ चाळीसगावकडून मालेगावकडे जाणाऱ्या दुचाकीला समोरून येणाऱ्या पिकअप वाहनाने जोरात धडक दिल्याने दुचाकीस्वार जागीच ठार झाला. मृतांची ओळख पटलेली नाही. ही घटना शुक्रवारी रात्री सव्वाअकरा वाजता घडली. घटना घडताच पिकअप वाहनचालक वाहनासह पळून जात असताना पोलिस व नागरिकांनी त्याचा पाठलाग करीत बेलगंगा साखर कारखान्याजवळ पकडले. मेहुणबारे पोलिसात गुन्हा दाखल झाला आहे.
सविस्तर वृत्त असे कि, शुक्रवारी रात्री ११:१५ वाजेच्या सुमारास पिकअप वाहनचालकाने भरधाव वेगाने मालेगावकडून चाळीसगावकडे येत असताना चाळीसगाव-मालेगाव रस्त्यावर असलेल्या हॉटेलसमोर चाळीसगावकडून मालेगावच्या दिशेने जाणाऱ्या दुचाकीस्वारास जोराने धडक दिली. ही धडक एवढ्या जोरात होती की, दुचाकीस्वाराच्या डोक्यास जबर मार लागून तो जागीच ठार झाला. अपघात करून पिकअपचालकाने वाहन न थांबवता चाळीसगावच्या दिशेने पळ काढला. बेलगंगा साखर कारखान्याजवळ हे वाहन थांबवून वाहनचालकाला ताब्यात घेतले. तेव्हा त्याने अपघाताची कबुली देऊन आपले नाव रिहान ऊर्फ अब्बू अली सय्यद अली (नगरदेवळा, ता. पाचोरा) असे असल्याचे सांगितले.
