जामनेर : प्रतीनिधी
तालुक्यातील पहूर कसबे येथील युवक गणेश ज्ञानेश्वर बनकर (२७) याचा बुधवारी नेरी, ता. जामनेर येथे जात असताना अपघात झाला होता. त्यात तो गंभीर जखमी झाला होता. गुरुवारी उपचारादरम्यान त्याचा मृत्यू झाल्याची बातमी पहूर गावात धडकली. घरातील कर्ता मुलगा व एका चिमुरड्याचे पितृछत्र हरपल्याने गावावर शोककळा पसरली आहे.
सविस्तर वृत्त असे कि, पहूर कसबेतील रहिवासी ज्ञानेश्वर बाळकृष्ण बनकर यांचा चिरंजीव गणेश ज्ञानेश्वर बनकर हा जळगाव येथे कामाला आहे. नेहमीप्रमाणे बुधवारी सकाळी घरून दुचाकीने जळगावला जाण्यासाठी तो निघाला. जळगाव-छत्रपती संभाजी नगर रस्त्यावर नेरी येथे श्वानामुळे दुचाकीला अपघात झाला. यात गणेश याच्या डोक्याला जबर दुखापत झाल्याने तो गंभीर जखमी झाला. त्याच्यावर जळगाव येथील खासगी रुग्णालयात उपचार सुरू असताना गुरुवारी दुपारी त्याच्या मृत्यूची बातमी गावात येऊन धडकली.
गणेश हा घरचा कर्ता मुलगा होता.
घरी तीन ते चार एकर जमीन असल्याने वडील अल्पभूधारक शेतकरी आहेत. दररोज जळगाव येथे गणेश कामासाठी येत होता. त्याच्या अकाली मृत्यूने परिवार उघड्यावर आला असून त्याच्या चार वर्षांच्या चिमुरड्याचे पितृछत्र हरपले आहे. पश्चात पत्नी, आई, वडील, भाऊ व दोन बहिणी असा परिवार आहे.
