सातारा : वृत्तसंस्था
सातारा बसस्थानकाबाहेर आरडाओरड करत दंगा करणाऱ्या तरुणांना हटकल्याने एका तरुणाने हवालदार दत्ता पवार यांच्या काखेत कोयत्याने वार केले. यामध्ये पवार जखमी झाले असून, त्यांच्यावर शस्त्रक्रिया करण्यात आली आहे. ही धक्कादायक घटना शनिवारी रात्री साडेदहा वाजता घडली.
सविस्तर वृत्त असे कि, सातारा शहर पोलिस ठाण्यातील हवालदार दत्ता पवार हे सातारा बसस्थानकातील चौकीत रात्री ड्यूटीवर होते. त्यावेळी बसस्थानकाबाहेरील रिक्षा थांब्याजवळ काही तरुण दारूच्या नशेत आरडाओरड करत असल्याचे त्यांना प्रवाशांनी सांगितले. त्यानंतर संबंधित तरुणांना त्यांनी हटकल्यानंतर तेथून दंगा करणारे तरुण निघून गेले. सुमारे पंधरा मिनिटांनंतर मोपेड दुचाकीवरून चौघेजण पुन्हा त्या ठिकाणी आले आणि पवार यांना काही कळायच्या आत मोपेडवर अगदी शेवटी बसलेल्या तरुणाने त्यांच्या काखेत कोयत्याने वार केला. यानंतर संबंधित तरुण मोपेडवरून पळून गेले. रक्तबंबाळ अवस्थेतही पवार यांनी त्यांचा पाठलाग केला.
