पारोळा : प्रतिनिधी
येथील राष्ट्रीय महामार्गावरील सावखेडा होळ गावाजवळ रविवारी सकाळी ७:०० वाजेच्या सुमारास कंटेनर व टेम्पो यांच्यात समोरासमोर अपघात झाला. त्यात एकाचा मृत्यू झाला, तर सहा जण जखमी झाल्याची घटना घडली.
सविस्तर वृत्त असे कि, रविवारी सकाळी सात वाजेच्या सुमारास जळगावहून धुळ्याकडे जाणारा कंटेनर (सीजी ०६ एम ११६६) हा भरधाव वेगाने येत होता. त्याचवेळी समोरून येणाऱ्या टेम्पोला (एमएच ११ बीएल ३११२) जोरदार धडक दिली. त्यात सातजण जखमी झाले. यात राहुल गणपत चव्हाण, रोहिदास परशुराम चव्हाण (दोन्ही मोरगाव तांडा, ता. जामनेर), गणेश पुरा चव्हाण, राघो ओंकार चव्हाण, दारासिंग ओंकार चव्हाण, ट्रालीवरील चालक व क्लिनर (नाव गाव माहीत नाही) हे जखमी झाले आहेत.
घटनेचे वृत्त कळताच रुग्णवाहिकेतून त्यांना पारोळा कुटीर रुग्णालय येथे दाखल केले व पुढील उपचारार्थ जळगाव येथे हलवण्यात आले होते. त्यात रोहिदास परशुराम चव्हाण (६०) यांचा मृत्यू झाला. याबाबत राहुल चव्हाण यांनी दिलेल्या फिर्यादीवरून पारोळा पोलिसात कंटेनर चालकाविरुद्ध गुन्हा दाखल करण्यात आला आहे.
