अमळनेर : प्रतिनिधी
तालुक्यातील बोदर्डे येथील 47 वर्षीय प्रौढाने खासगी सावकारांच्या जाचाला कंटाळून गळफास लावून आत्महत्या केली. ही घटना २१ जुलै रोजी उघडकीस आली.
याबाबत मंजुळाबाई मिस्तरी यांनी दिलेल्या फिर्यादीनुसार, त्यांचे पती संतोष हिरामण मिस्तरी यांनी गावातील अशोक दयाराम चौधरी यांच्याकडून २० हजार रुपये व मुडी येथील भालेराव गोविंदा महाजन यांच्याकडून १५ हजार रुपये व्याजाने घेतले होते. संपूर्ण कुटुंबीय मोलमजुरी करून २० हजारांचे आठवड्याला दोन हजार व १५ हजारांचे महिन्याला तीन हजार असे व्याज देत होते. मात्र दोघेही घरी येऊन व्याजाचे पैसे का देत नाही? असे विचारून त्रास देत असत.
तसेच संशयितांनी वेळोवेळी सुतारकाम करण्याचे साहित्य, दुचाकी तसेच घरातील वस्तू उचलून नेल्या आहेत. २० जुलै रोजी सायंकाळी अशोक चौधरी व भालेराव महाजन हे दोघे मिस्तरी यांच्या घरी आले व ‘तू चालू हप्त्याचे व्याज दिले नाही’, असे म्हणू लागले. या वादामुळे संतोष मिस्तरी रात्री उशिरापर्यंत जागे होते. दुसऱ्या दिवशी सकाळी ते रूममध्ये दिसून आले नाहीत म्हणून त्यांची पत्नी मागच्या रूममध्ये गेली असता, त्यांनी मागील रूममध्ये दोरीच्या सहाय्याने गळफास घेतल्याचे दिसून आले. आजूबाजूच्या लोकांनी त्यांना खाली उतरवून अमळनेर ग्रामीण रुग्णालयात दाखल केले असता, डॉक्टरांनी तपासून मृत घोषित केले. मारवड पोलिस ठाण्यात दोन्ही खासगी सावकारांविरुद्ध गुन्ह्याची नोंद करण्यात आली आहे.
