भुसावळ : प्रतिनिधी
महामार्गावरील नवोदय विद्यालयाच्या मागील बाजूस साकेगाव शिवारात एका अनोळखी मुलाचा निंबाच्या झाडाखाली मृतदेह आढळला. ही घटना १८ रोजी सायंकाळी सहा वाजण्याच्या सुमारास उघडकीस आली. याप्रकरणी तालुका पोलिस ठाण्यात अकस्मात मृत्यूची नोंद करण्यात आली आहे. याबाबत घातपाताची शक्यता वर्तविली जात आहे.
मिळालेल्या माहितीनुसार, साकेगाव शिवारात नवोदय विद्यालयाच्या मागील बाजूस यज्ञेश मोहन नेमाडे मित्रासह शेत पाहण्यासाठी गेले असता त्यांना निंबाच्या झाडाखाली सुमारे १४ ते १५ वर्षांच्या मुलाचा मृतदेह दिसला. त्यांनी तालुका पोलिसांना माहिती दिली. घटनास्थळी पोलिस निरीक्षक महेश गायकवाड, पोहेका संजय तायडे, संजय भोई, वाल्मिक सोनवणे, जगदीश भोई यांच्या पथकाने धाव घेत पाहणी केली. मृतदेहाच्या शेजारी टी-शर्ट निळ्या रंगाची फुल पँट आढळली. तो शेतशिवारात नेमका कशासाठी आला होता? कोणी आणलं? हा घातपात तर नाही? असे एक ना अनेक प्रश्न उपस्थित होत आहेत.
