धरणगाव : प्रतिनिधी
तालुक्यातील पिंप्री खुर्द गावाजवळील चैताली जिनिंगजवळ कार आणि दुचाकीच्या समोरासमोर झालेल्या भीषण अपघातात पिंप्री येथील दुचाकीस्वार तरुण जागीच ठार झाला तर त्याचा भाऊ गंभीर जखमी झाल्याची घटना रविवारी सायंकाळी ६ वाजेच्या सुमारास घडली. रॉबिन संजय सोनवणे (२२, पिंप्री, ता. धरणगाव) असे मयत दुचाकीस्वाराचे नाव आहे.
सविस्तर वृत्त असे कि, पिंप्री गावातील जिनिंगजवळील रस्त्यावर रॉबिन सोनवणे आणि त्याचा भाऊ रोहित सोनवणे हे दुचाकी क्रमांक (एमएच१९/डीई ६६४९) ने निघाले होते. त्यावेळी दुचाकी जळगाव- धरणगावच्या मुख्य रस्त्यावर लागल्यानंतर जळगावकडून धरणगावकडे जाणारी भरधाव कार आणि दुचाकी यांच्यात समोरासमोर भीषण अपघात झाला. यात रॉबिन सोनवणे याचा जागेवरच मृत्यू झाला. त्याच्यासोबत असलेला त्याचा भाऊ रोहित सोनवणे हा गंभीर जखमी झाला. ही घटना घडल्यानंतर जखमी रोहितला तातडीने धरणगाव ग्रामीण रुग्णालयात दाखल करण्यात आले.
