अमळनेर : प्रतिनिधी
तालुक्यातील येथील शारदा माध्यमिक विद्यालयाच्या इयत्ता नववीतला विद्यार्थी घनश्याम जितेंद्र महाजन (वय १५) हा संध्याकाळी ४:३० च्या सुमारास शाळेत मैदानात खेळत असताना अचानक चक्कर येऊन पडला. त्याचवेळी त्याचे निधन झाले.
मिळालेल्या माहितीनुसार, घनःश्याम पडल्यानंतर लगेचच त्याला शिक्षकांनी सावरले व स्थानिक डॉक्टरांनी तपासणी केली. त्याच्यावर प्रथमोपचार केले व त्वरित अमळनेर येथे खासगी दवाखान्यात दाखल केले. त्यानंतर त्याला अमळनेर ग्रामीण रुग्णालयात नेण्यात आले. तेथे वैद्यकीय अधिकारी डॉ. जी. एम. पाटील यांनी तपासून मृत घोषित केले. घनश्याम हा आई-वडिलांचा एकुलता मुलगा होता. अत्यंत नम्र व हुशार असलेला हा गुणी विद्यार्थी क्रीडा, नाटक सांस्कृतिक कार्यक्रम इत्यादी सर्व कार्यक्रमांत भाग घेणारा विद्यार्थी होता. यावेळी संस्थाध्यक्ष, मुख्याध्यापक, सर्व शिक्षक यांनी अमळनेर ग्रामीण रुग्णालयात धाव घेतली. त्याच्या पश्चात आई-वडील, आजी आजोबा, काका व दोन बहिणी असा परिवार आहे. अमळनेर ग्रामीण रुग्णालयात शवविच्छेदन होऊन मारवड पोलिस ठाण्यात अकस्मात मृत्यूची नोंद करण्यात आली आहे.
