जळगाव : प्रतिनिधी
घरात सर्व जण झोपलेले असताना पहाटे ४:३० वाजेच्या सुमारास घराबाहेर ‘एसी’च्या आउट डोअरला वायरने गळफास घेत प्रमोद गुंड्या माचरेकर (३८, रा. कंजरवाडा) यांनी आत्महत्या केली. ही घटना गुरुवारी (११ जुलै) पहाटे कंजरवाडा परिसरात घडली. मयताच्या खिशात एक चिठ्ठी सापडली असून, त्यावर पत्नीसह सासरच्या मंडळींची नावे असून, कौटुंबिक वादातून प्रमोद यांनी आत्महत्या केल्याचा आरोप मयताची आई व पुतण्याने केला आहे. याप्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, मिळेल ते काम करून उदरनिर्वाह करणारे प्रमोद माचरेकर हे पत्नी, दोन मुली, मुलगा व आईसह कंजरवाडा परिसरात राहत होते. घरात सर्व सदस्य झोपलेले असताना गुरुवारी पहाटे त्यांनी घराला लागून असलेल्या छोट्याशा बोळीत जाऊन तेथे वातानुकूलित यंत्राच्या (एसी) आउट डोअरच्या अँगलला वायरने गळफास घेतला. सकाळी त्यांची मुलगी तिकडे गेली, त्यावेळी तिला वडिलांनी गळफास घेतल्याचे दिसले. तिने कुटुंबीयांना याविषयी माहिती दिली व त्यांनी एमआयडीसी पोलिसांना कळविले. त्यानुसार पोलिस घटनास्थळी आले. त्यांनी प्रमोद यांना खाली उतरवून शासकीय वैद्यकीय महाविद्यालय व रुग्णालयात दाखल केले. तेथे डॉक्टरांनी त्यांना मयत घोषित केले.
