जळगाव : प्रतिनिधी
सोशल मीडियावर ओळख झाल्यानंतर सीआयडी अधिकारी असल्याचे सांगत व्यावसायिकाला जेवणातून गुंगीचे औषध देत त्याचे आक्षेपार्ह फोटो काढत खंडणी उकळणाऱ्या महिलेला रामानंदनगर पोलिसांनी जेरबंद केले आहे. गेल्या अनेक दिवसांपासून ‘हनी ट्रॅप’ करणारी ही महिला १५ जुलैपर्यंत पोलिस कोठडीत गेली आहे.
मिळालेल्या माहितीनुसार, शहरातील रायसोनी नगर परिसरात राहणाऱ्या एका व्यावसायिकाची सोशल मीडियावर एका महिलेशी ओळख झाली. तिने व्यावसायिकाला आपण सीआयडी अधिकारी तर पती रेल्वेत टी.सी. असल्याचे सांगितले. ७ मार्च रोजी धुळे येथे ती व्यावसायिकाला भेटली. तेथे जेवणात गुंगीचे औषध देत एका फ्लॅटवर घेऊन गेली. याठिकाणी व्यावसायिकाचे आक्षेपार्ह फोटो काढत तिच्यासोबत शारीरिक संबंध ठेवण्यास भाग पाडले. दरम्यान, या महिलेने व्यावसायिकाला ब्लॅकमेल करण्यास सुरुवात केली. तसेच ‘तू माझ्यासोबत रिलेशनशिप सुरू ठेव, नाहीतर तुझ्यावर बलात्काराचा गुन्हा दाखल करेल’, अशी धमकी दिली. याशिवाय गरोदर असल्याचे सांगत त्या महिलेने व्यावसायिकाकडून तीन लाख रुपये उकळले.
काही दिवसांपूर्वी या महिलेने व्यावसायिकाच्या घरी जाऊन १५ लाखांची मागणी केली. तसेच व्यावसायिकासह त्यांच्या पत्नीला लोखंडी सळईने मारहाण करीत त्यांच्या गळ्यातील १० ग्रॅमची चेन व त्यांच्या पत्नीचे ३० ग्रॅमचे मंगळसूत्र हिसकावून घेतले. शेजाऱ्यांनी या व्यावसायिक दाम्पत्याला त्या महिलेच्या तावडीतून सोडवत खासगी रुग्णालयात दाखल केले.
