जळगाव : प्रतिनिधी
अश्लिल हातवारे करीत शनिपेठ पोलीस ठाण्याच्या हद्दीत राहणाऱ्या चौदा वर्षीय अल्पवयीन मुलीचा विनयभंग केल्याची घटना उघडकीस आली. याचा जाब विचारण्यासाठी गेलेल्या मुलीच्या वडीलांवर संशयिताने कटरने वार करीत गंभीर जखमी केले. ही घटना रविवार दि. ७ जुलै रोजी घडली. याप्रकरणी रविवारी शनीपेठ पोलीस ठाण्यात एका तरूणावर गुन्हा दाखल करण्यात आला.
सविस्तर वृत्त असे कि, शहरातील शनीपेठ पोलीस ठाण्याच्या हद्दीत १४ वर्षीय अल्पवयीन मुलगी ही परिवारासह वास्तव्याला आहे. दरम्यान, मिहिर प्रल्हाद भिडे (वय २५) हा तरुण अल्पवयी मुलीच्या घरासमोरुन ४ ते ५ वेळा फेऱ्या मारत होता. तसेच त्याने मुलीला अश्लिल हातवारे देखील केले. त्याचा जाब विचारण्यासाठी मुलीचे वडील त्या तरुणाच्या घरी गेले असता, त्याने संतापाच्या भरात कटरने मुलीच्या वडीलांवर वार करुन गंभीर जखमी केले. यामध्ये मुलीच्या वडीलांच्या हाताला गंभीर दुखापत करुन तो पसार झाला. याप्रकरणी पिडीत मुलीच्या वडीलांनी शनीपेठ पोलीसात धाव घेवून तक्रार दिली. त्यानुसार संशयित आरोपी मिहीर प्रल्हाद भिडे यांच्या विरोधात गुन्हा दाखल करण्यात आला. पुढील तपास पोलीस उपनिरीक्षक मुबारक तडवी हे करीत आहे.
