यावल : प्रतिनिधी
तालुक्यातील दगडी (मनवेल) येथील एका ४० वर्षीय युवकाने आपल्या राहत्या घरात दोरीच्या सहाय्याने गळफास घेत आत्महत्या केल्याची घटनासमोर आली आहे.
मिळालेल्या माहितीनुसार, दगडी येथील प्रकाश विक्रम कोळी (वय ४०) हे २ जुलै रोजी नियमितपणे जेवण करून आपल्या घरात झोपले. सकाळी कुटूंबीय त्यांना कामासाठी उठवण्यासाठी गेले असता प्रकाश कोळी यांनी घराच्या छतावरील सऱ्याला दोरीच्या सहाय्याने गळफास घेतल्याचे दिसून आले. हा प्रकार कुटुंबीयांच्या निदर्शनास येताच युवकाला तातडीने उपचारासाठी यावल ग्रामीण रुग्णालयात दाखल केले. येथे डॉ. प्रशांत जावळे यांनी तपासणीत करुन प्रकाश कोळी यांना मृत घोषित केले. याप्रकरणी यावल पोलिस ठाण्यात पोलीस पाटील जिवन कोळी यांच्या माहितीवरुन अकस्मात मृत्यूची नोंद करण्यात आली आहे. दरम्यान, मयत प्रकाश कोळी हे शेतमजुरी करून आपल्या कुटुंबाचा उदरनिर्वाह चालवत होते. कोळी यांच्या पश्चात पत्नी, मुलगा व वडील असे कुटुंब आहे. तपास पो.नि. प्रदीप ठाकूर यांच्या मार्गदर्शनात हवालदार सिकंदर तडवी करत आहेत.
