जळगाव प्रतिनिधी । गुरे चारण्याच्या कारणावरून कंडारी येथील एकाला बेदम मारहाण केल्याचा प्रकार समोर आला आहे. याप्रकरणी नशिराबाद पोलीस ठाण्यात दोन जणांवर गुन्हा दाखल करण्यात आला आहे.
राजू शेख बाबु (वय-५४) रा. कंडारी ता.जि. जळगाव असे जखमी झालेल्या व्यक्तीचे नाव आहे. राजू शेख हे आपल्या कुटुंबियांसह वास्तव्याला आहे. ते शेतीचे काम करून उदरनिर्वाह करतात. गुरूवारी १३ जानेवारी रोजी राजू शेख यांच्या शेताच्या बांधावर भाऊसाहेब राजेंद्र सुर्वे याने गुरे चारण्यासाठी सोडले होते. शुक्रवार १४ जानेवारी रोजी सकाळी ९ वाजता गुरे चारण्याबाबत विचारणा करण्यासाठी राजू शेख बाबु हे घरी गेले असता याचा राग असल्याने भाऊसाहेब राजेंद्र सुर्वे आणि मयुर विश्वासराव सुर्वे रा. कंडारी ता.जि.जळगाव यांनी चापटाबुक्क्याने बेदम मारहाण करून गंभीर दुखापत केली. याप्रकरणी राजू शेख बाबु यांच्या फिर्यादीवरून दुपारी ३ वाजता नशिराबाद पोलीस ठाण्यात दोन जणांविरोधात गुन्हा दाखल करण्यात आला आहे. पुढील तपास स. फौ. शेख गफुर शेख कादर हे करीत आहे.
