यावल प्रतिनिधी । तालुक्यातील चुंचाळे येथील या तरूणाने राहत्या घरात गळफास घेवून आत्महत्या केल्याची घटना शुक्रवार १४ जानेवारी रोजी सकाळी १० वाजेच्या सुमारास घडली. याप्रकरणी यावल पोलीसात अकस्मात मृत्यूची नोंद करण्यात आली आहे.
असलम सायबु तडवी (वय-३० ) असे मयत तरूणाचे नाव आहे. पोलीसांनी दिलेल्या माहितीनुसार, असलम तडवी हा आपल्या कुटुंबियांसह वास्तव्याला आहे. हातमजूरी करून आपल्या कुटुंबियाचा उदरनिर्वाह करतो. शुक्रवारी १४ जानेवारी रोजी सकाळी १० वाजता असलम तडवी यांचे कुटुंबिय थंडीचे दिवस असल्यामुळे घराबाहेर उन्हात बसले होते. त्यावेळी असलम तडवीने राहत्या घरात साडीने गळफास घेवून आत्महत्या केल्याचे सकाळी १०.३० वाजेच्या सुमारास उघडकीला आला. असलमचा सहा वर्षाचा मुलगा आशु तडवी हा वडीलांना पाहण्यासाठी घरात गेला असता हा प्रकार लक्षात आला. नातेवाईकांना तातडीने असलमला खाली उतरवून रूग्णालयात दाखल करण्यात आले असता वैद्यकीय अधिकारी यांनी मयत घोषीत केले. आत्महत्या करण्याचे कारण अद्याप समजू शकले नाही. शवविच्छेदन करून मृतदेह नातेवाईकांच्या ताब्यात देण्यात आले. याप्रकरणी यावल पोलीस ठाण्यात अकस्मात मृत्यूची नोंद करण्यात आली.
