भुसावळ : प्रतिनिधी
शहरातील जाम मोहल्ला येथे किरकोळ कारणावरून एका वृद्धाला लोखंडी वस्तूने मारहाण करण्यात आली. यामुळे या वृद्धाला गंभीर दुखापत झाली आहे. ही घटना २१ जून रोजी रात्री ११ वाजता घडली.
मिळालेल्या माहितीनुसार, शहनवाज खान रशिद खान (वय ६०) हे शुक्रवारी रात्री ११ वाजेच्या दरम्यान घरासमोर बसले असताना शेजारील घरासमोर पाणी फेकण्याच्या कारणावरून शेख जुनेद शेख शकील याने शिवीगाळ करून मारहाण केली. तसेच लोखंडी वस्तू त्यांच्या डोक्यात मारून दुखापत केली.जखमी शाहनवाज यांना लगेच उपचारार्थ रुग्णालयात दाखल करण्यात आले. याप्रकरणी २२ रोजी मध्यरात्री भुसावळ बाजारपेठ पोलिस ठाण्यात गुन्हा दाखल करण्यात आला आहे. पुढील तपास पोलिस नाईक सोपान पाटील हे करीत आहे.
