जळगाव : प्रतिनिधी
जळगाव वडील बाहेर गेलेले असताना निशा मनोज परदेशी (१६, रा. तळेले कॉलनी) या इयत्ता दहावीच्या विद्यार्थिनीने राहत्या घरात गळफास घेऊन आत्महत्या केली. ही घटना रविवार, २३ जून रोजी सकाळी उघडकीस आली. या प्रकरणी शनिपेठ पोलिस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, पेट्रोलियम कंपनीत सुरक्षा रक्षक असलेले मनोज परदेशी हे पत्नी, दोन मुलींसह तळेले कॉलनीत राहतात, रविवारी सकाळी रुग्णालयात असलेल्या नातेवाइकांसाठी ते चहा घेऊन गेले होते. त्या वेळी आई व लहान बहीण घरी असताना निशा परदेशी हिने घरात गळफास घेतला. मुलीने गळफास घेतल्याचे आईला दिसताच आक्रोश केला. शेजारी राहणाऱ्या नागरिकांच्या मदतीने मुलीला शासकीय वैद्यकीय महाविद्यालय व रुग्णालयात दाखल करण्यात आले. तेथे वैद्यकीय अधिकाऱ्यांनी मयत घोषित केले. याप्रकरणी शनिपेठ पोलिस ठाण्यात अकस्मात मृत्यूची नोंद करण्यात आली. मयत मुलीच्या पश्चात आई, वडील आणि लहान बहीण असा परिवार आहे.
