पारोळा : प्रतिनिधी
धरणगावकडे जाणाऱ्या बायपास रोडजवळ संशयितरित्या फिरणाऱ्या दोघांकडून देशी बनावटीचा गावठी कट्टा तसेच दोन जिवंत काडतुसे जप्त करण्यात आली. शनिवारी रात्री ११ वाजता ही कारवाई करण्यात आली. श्यामकांत एकनाथ पाटील (२६) आणि भिकन तुकाराम पाटील (२६, दोघे रा. पारोळा) अशी अटक करण्यात आलेल्यांची नावे आहेत.
मिळालेल्या माहितीनुसार, धरणगावकडे जाणाऱ्या बायपास रोड चौफुलीवर शनिवारी रात्री दोन जण संशयास्पदरीत्या फिरत होते. पोलिसांनी अंगझाडती घेतली असता त्यांच्याजवळ १५ हजार रुपये किमतीचा गावठी कट्टा, दोन जिवंत काडतूस आढळून आले. पोलिसांनी त्यांच्याजवळील तीस हजार रुपये किमतीची मोटारसायकल, १८ हजार रुपये किमतीचे दोन मोबाइल असे एकूण ६५ हजार रुपये किमतीचा मुद्देमाल जप्त केला. याबाबत पोकॉ. भूषण राजाराम पाटील यांनी फिर्याद दिल्यानुसार गुन्हा दाखल करण्यात आला.
