जळगाव : प्रतिनिधी
राज्यात सध्या शिक्षक मतदार संघाची निवडणूक चर्चेत येत असतांना जळगाव मुख्यमंत्री एकनाथ शिंदे यांच्या सभेनंतर महायुतीच्या नेत्यांकडून शिक्षक, कर्मचारी, मुख्याध्यापक आणि संस्थाचालकांना पैसे वाटप करण्यात आले, असा गंभीर आरोप ठाकरे गटाच्या नेत्या सुषमा अंधारे यांनी केला आहे. त्यांनी यासंदर्भात थेट व्हिडिओच शेअर केला आहे. तसेच त्यांनी निवडणूक आयोग कुठे आहे? असा प्रश्न देखील उपस्थित केला आहे.
सुषमा अंधारे यांनी ट्विटरवर यासंदर्भात महायुती सरकारवर गंभीर आरोप केले आहेत. महायुतीचे उमेदवार दराडे यांच्या प्रचारार्थ मुख्यमंत्री एकनाथ शिंदे यांची जळगावातील आदित्य लॉन्सला सभा झाली. या सभेनंतर जिल्ह्यातील प्रत्येक शाळेचे शिक्षक, कर्मचारी, मुख्याध्यापक, संस्थाचालक यांना पैसे वाटप करण्यात आले”, असं सुषमा अंधारे म्हणाल्या. तसेच निवडणूक आयोग कुठं आहे? असा प्रश्नदेखील त्यांनी विचारला आहे.
दरम्यान, नाशिक शिक्षक मतदार संघाची निवडणूक येत्या 26 जून रोजी होणार आहे. यानिमित्त काल मुख्यमंत्री एकनाथ शिंदे हे जळगाव दौऱ्यावर होते. यावेळी त्यांनी रात्री जळगावातील आदित्य लॉन येथे सभाही घेतली. या सभेला जळगाव-धुळे-नंदुरबार जिल्ह्यातील सर्व शैक्षणिक संस्थेतील संस्थाचालक तसेच मुख्याध्यापक कर्मचारी या सभेला उपस्थित होते. मात्र सुषमा अंधारे यांच्या आरोपाने आता खळबळ उडाली आहे.
