चोपडा : प्रतिनिधी
तालुक्यातील चहार्डी ते वेले रस्त्यावर गुरुवारी चोपडा-भाई ही बस दुपारी १२ वाजेच्या दरम्यान डंपरला ओव्हरटेक करण्याच्या प्रयत्नात उलटली. या अपघातात दोन प्रवाशांसह चालक, वाहक किरकोळ जखमी झाले आहेत. सुदैवाने यात जीवितहानी झालेली नाही.
मिळालेल्या माहितीनुसार, चोपडा-भाई ही बस (एमएच१४ / बीटी २०८३) भाई येथून चहार्डी मार्गे चोपडा येथे परत येत असताना चहार्डी ते वेले गावादरम्यान कारखान्याच्या मुख्य प्रवेशद्वाराजवळ मुरूमाने भरलेला डंपर पुढे जात असताना बसचालकाने डंपरला ओव्हरटेक करण्याचा प्रयत्न केला. यात साईडपट्ट्यांवर मुरूम असल्याने मुरूम खचून बसची एक बाजू पूर्ण खोल भागात गेली व बस विरुद्ध दिशेला खड्यात गेली. डंपर चालकाने साईड न दिल्याने बस उलटली असल्याची माहिती आगार व्यवस्थापक महेंद्र पाटील यांनी दिली आहे. बसला क्रेनद्वारे बाहेर काढण्यात आले. बसमध्ये ३३ प्रवासी असल्याची माहिती मिळाली आहे.
