जळगाव : प्रतिनिधी
भरधाव दुचाकी दुभाजकाला धडकून झालेल्या अपघातात जळगाव येथील तरुण ठार झाला. जळगाव येथून धुळ्याकडे येत असताना फागणे गावाजवळ बुधवारी सकाळी ७ वाजेच्या सुमारास घडली. अपघातातील अन्य दोन तरुण गंभीर जखमी आहेत. मयत तरुणाचे जुनेर शेख (वय २५, रा. जळगाव) असे नाव आहे. जळगावमधील तांबापुरा भागात राहणारे जुनेर शेख, अरबाज खाटीक, सलमान खाटीक हे २० ते २५ वयोगटातील तरुण दुचाकीने जळगावहून धुळ्याकडे ट्रिपल सीट येत होते.
मिळालेल्या माहितीनुसार, धुळे तालुक्यातील फागणे गावाजवळ त्यांची दुचाकी अनियंत्रित झाल्यामुळे दुभाजकावर जाऊन धडकली. यात जुनेर शेख याचा मृत्यू झाला. तर अरबाज आणि सलमान हे दोघे गंभीर जखमी झाले आहेत. या घटनेची माहिती मिळताच फागणे गावासह धुळ्यातील बऱ्याच जणांनी घटनास्थळी धाव घेतली. तातडीने तिघा जखमींना हिरे वैद्यकीय महाविद्यालयात दाखल करण्यात आले. तत्पूर्वीच डोक्याला मार लागल्यामुळे जुनेर शेख याचा मृत्यू झाला. धुळे तालुका पोलिस ठाण्यात अपघाताची नोंद करण्यात आली.
