जळगाव : प्रतिनिधी
जळगाव जिल्ह्यातील जळगाव व रावेर लोकसभा मतदार संघात यंदाची निवडणुक चांगलीच चुरशीची झाली होती. त्यानंतर आज ४ जून रोजी सकाळी मतमोजणी सुरू आहे. दोन्ही जागांवर सुरूवातीपासून भाजपाच्या उमेदवारांनी आघाडी घेतली होती.
जळगाव मतदारसंघाची मतमोजणी पूर्णत्वाकडे आली असून त्यानुसार भाजपाच्या स्मिता वाघ या विजयी झाल्या आहेत तर रावेरमध्ये विद्यमान खासदार रक्षा खडसे या विजयी झाल्या असून त्यांनी महाविकास आघाडीचे श्रीराम पाटील यांचा दारुण पराभव केला आहे. मात्र अधिकृत घोषणा अद्याप बाकी आहे.
जळगावसह रावेरात मिळालेल्या यशानंतर जळगावातील जी.एम.फाउंडेशनच्या कार्यालयाबाहेर भाजपा कार्यकर्त्यांनी ढोल ताशांच्या गजरात बेभान होवून नृत्याला सुरूवात केली आहे. दोन्ही जागांवर यशाचे शिलेदार हे मंत्री गिरीश महाजन व आमदार मंगेश चव्हाण ठरले आहेत.
