अमळनेर प्रतिनिधी ।
अमळनेर शहरातील सराफबाजार येथून बीएसएनएल कंपनीच्या तांब्याच्या केबल वायर चोरून नेल्याची घटना 10 मे रोजी सकाळी उघडकीला आली आहे. याप्रकरणी सोमवार 27 मे रोजी सायंकाळी 6 वाजता अमळनेर पोलिसात गुन्हा दाखल करण्यात आला आहे.
अमळनेर शहरात सराफ बाजार परिसरात बीएसएनएल कंपनीच्या तांब्याच्या केबल वायर ठेवण्यात आल्या होत्या. दरम्यान 21 फेब्रुवारी ते 10 मे च्या दरम्यान अज्ञात चोरट्यांनी या 35 हजार रुपये किमतीच्या केबल वायर चोरून नेल्याची घटना उघडकीला आली आहे. याप्रकरणी कर्मचारी पंकज रायसिंघनी रा. अमळनेर यांनी सोमवारी 27 मे रोजी सायंकाळी 6 वाजता अमळनेर पोलिसात तक्रार दिली. त्यानुसार अज्ञात चोरट्यांवर गुन्हा दाखल करण्यात आला. पुढील तपास पोलीस हेड कॉन्स्टेबल प्रमोद पाटील हे करीत आहे.
