जळगाव : प्रतिनिधी
शहराजवळ असलेल्या मोहाडी येथे अक्षयतृतीयेनिमित्त पत्ते खेळताना दोन जणांमध्ये वाद झाले होते. या दोघांमध्ये मोहाडी रोडवरील जगवानी पेट्रोल पंपाजवळ दोन्ही गटांमध्ये समझोता सुरु होता. परंतु, तेथे त्यांच्यामध्ये पुन्हा वाद उफाळून आल्याने काहिंनी दगडफेक करण्यास सुरुवात केली. यामुळे शेजारीच राहणाऱ्या माजी जि.प. सदस्यांच्या घरावरही दगडफेक झाली. यात त्यांच्या घराच्या खिडकीच्या काचा फुटल्या असून त्यांच्या वाहनाचीही तोडफोड करण्यात आली आहे.
सविस्तर वृत्त असे कि, जळगाव शहरापासून जवळ असलेल्या मोहाडी गावात अक्षयतृतीयनिमित्त पत्यांचा डाव सुरू होता. यामध्ये पत्ते खेळत असताना एकासोबत वाद झाल्याने त्याला मारहाण करण्यात आली. त्यामुळे तो व्यक्ती एमआयडीसी पोलीस ठाण्यात तक्रार देण्यासाठी गेला होता, परंतु त्यांनी तक्रार दिलीच नाही. तेथून तो परत मोहाडी गावात येण्यासाठी निघाला होता. दरम्यान, मोहाडी रोडवरील इम्पेरियल अपार्टमेंट जवळील जगवानी पेट्रोल पंपासमोर दुपारच्या वादातून दोन गट एकमेकांना भिडले. या दोन गटातील हा वाद जास्त वाढल्याने काही तरुणांनी दगडफेक केली.
ही घटना शुक्रवारी १० मे रोजी सायंकाळी ७.३० वाजेच्या सुमारास घडली. या वेळी संतप्त झालेल्या दोन्ही गटातील व्यक्तींनी एकमेकांवर तुफान दगडफेक करण्यास सुरूवात केली. या दगडफेकीमध्ये रस्त्यावर उभी असलेल्या एका चारचाकी वाहनाचे नुकसान झाले आहे. दरम्यान, यात माजी जिल्हा परिषद सदस्य पवन सोनवणे यांच्या घरावर ही दगडफेक झाल्याचे समोर आले आहे. त्यांच्या घराच्या गॅलरी आणि खिडकीचे काचा फुटल्या आहेत. त्यामुळे त्यांच्या घरातील लहान मुले व महिलांमध्ये भीतीचे वातावरण पसरले होते.
या घटनेची माहिती मिळाल्यानंतर स्थानिक गुन्हे शाखेचे वरिष्ठ पोलीस निरीक्षक किसन नजन पाटील, एमआयडीसी पोलीस ठाण्याचे प्रभारी पोलीस निरीक्षक बबन आव्हाड यांच्यासह सहायक फौजदार अतुल वंजारी, पो.कॉ. नाना तायडे व एमआयडीसी पोलीस ठाण्याचे पोलीस कर्मचाऱ्यांनी घटनास्थळी धाव घेतली. त्यानंतर त्यांनी या परिस्थितीवर नियंत्रण मिळवले. शेवटचे वृत्त हाती आले, तेव्हा एमआयडीसी पोलीस ठाण्यात गुन्हा दाखल करण्याचे काम सुरू होते. दरम्यान या घटनेमुळे जळगाव शहरात मोठी खळबळ उडाली आहे.
