जळगाव : प्रतिनिधी
उन्हाळ्याच्या सुट्यांमध्ये मामाच्या घरी आलेल्या स्वप्नील दीपक पाटील (१५, रा. बाळद, ता. भडगाव) या मुलाने गळफास घेऊन आत्महत्या केली. ही धक्कादायक घटना शुक्रवार, १० मे रोजी दुपारी कुसुंबा येथे उघडकीस आली. अक्षय्य तृतीया सण साजरा होत असताना आजी त्याला जेवणासाठी बोलवायला गेली त्या वेळी ही घटना समोर आली.
सविस्तर वृत्त असे कि, भडगाव तालुक्यातील बाळद येथील स्वप्नील पाटील हा इयत्ता नववी वर्गातून उत्तीर्ण होऊन दहावीत गेला. सध्या उन्हाळ्याच्या सुट्या असल्याने तो जळगाव तालुक्यातील कुसुंबा येथे मामा किशोर भानुदास पाटील यांच्याकडे लहान भावासह आला होता. शुक्रवार, १० मे रोजी सकाळी सर्व मुले बाहेर खेळत असताना तो घरात आला व वरच्या मजल्यावरील खोलीत गेला. दुपारी त्याची आजी त्याला जेवणासाठी बोलवायला गेली असता खोलीचा दरवाजा आतून बंद होता. त्यावेळी आजीने इतरांना बोलवले व दरवाजा तोडला असता स्वप्नील हा गळफास घेतलेल्या अवस्थेत दिसला. त्याला रुग्णालयात दाखल केले असता डॉक्टरांनी मयत घोषित केले.
