जळगाव : प्रतिनिधी
उसनवारी दिलेले पैसे परत मागितल्याच्या रागातून व काहीतरी जादूटोणा केल्याच्या संशयावरून भडगाव पेठ येथील ७८ वर्षीय वृद्धाचा धारदार शस्त्राने वार करून खून करण्यात आला आहे. ही घटना वरखेड (ता. भडगाव) येथे घटना घडली. संशयित आरोपीला पाच तासांतच जळगावच्या स्थानिक गुन्हे अन्वेषण शाखेच्या पोलिसांनी ताब्यात घेतले आहे.
सविस्तर वृत्त असे कि, सूपडू नाना पाटील (७८) हे परिसरात भगत म्हणून ओळखले जात. त्यामुळे त्यांच्याकडे नेहमी लोकांचे येणे-जाणे होते. पेठ भागातील हितेश ऊर्फ कुणाल चुडामण मराठे (२४) हासुद्धा नेहमी येत असे. त्याच्यासोबत सर्वांची ओळख होती. कुणाल यास सुपडू यांनी मार्च महिन्यात उसनवारीने एक महिन्याच्या बोलीवर १ लाख रुपये दिले होते. मात्र. त्याने ते परत केले नाहीत त्यामुळे मंगळवारी दुपारी सुपडू यांनी कुणाल यास फोन लावून पैशांची मागणी केली. त्याने पैसे परत देण्याच्या कारणावरून अरेरावी केली होती. सुपडू हे सायंकाळी ७:३० वाजेनंतर नेहमीप्रमाणे जेवण करून पेठ चौफुलीवर फिरण्यासाठी गेले होते. मात्र, रात्रभर घरीच आले नाहीत. बुधवारी सकाळी त्यांचा मृतदेह वरखेड गावाजवळ असलेल्या खदानीत दिसून आला. त्यांच्या डोक्यातून रक्त आले होते. शर्टही रक्ताने भरला होता. पोलिसांना मिळालेल्या गुप्त माहितीनुसार सुपडू हे मंगळवारी सायंकाळी कुणाल याच्यासोबत होते. त्यामळे पोलिसांनी याबाबत हितेश ऊर्फ कुणाल मराठे याच्याकडे विचारपूस केली असता त्याने उसनवारीने दिलेले पैसे परत देण्याच्या कारणावरून व त्यांनी आपल्याविरुद्ध जादूटोणा केल्याच्या संशयावरून खून केल्याची कबुली दिली.
याप्रकरणी कुणाल यास जळगाव येथील स्थानिक गुन्हे अन्वेषण शाखेच्या पोलिसांनी अटक केली आहे. स्थानिक गुन्हे शाखेचे पथकातील पोलिस उपनिरीक्षक गणेश वाघमारे, सहायक फौजदार विजयसिंग पाटील, सुधाकर अंभोरे, महेश महाजन, लक्ष्मण पाटील, राहुल पाटील, विजय पाटील, रमेश जाधव आदी गुन्हे शाखेच्या पथकाने ही कारवार्ड केली.
