यावल : प्रतिनिधी
तालुक्यातील वढोदा येथील एका घरात झालेल्या दोन लाख रुपयांहून अधिकच्या घरफोडी प्रकरणी दोन परप्रांतीय संशयितांना ताब्यात घेण्यात पोलिसांना यश आले आहे.
सविस्तर वृत्त असे कि, वढोदा येथे राहणारे प्रदीप दिनकर सपकाळे यांच्या घरात ८ ते २९ एप्रिल रोजीच्या दरम्यान मध्यरात्रीच्या सुमारास सपकाळे कुटुंब हे घराच्या छतावर झोपलेले असतांना अज्ञात चोरट्यांनी घरात प्रवेश करून एक लाख पन्नास हजार रुपये व दागिन्यांसह मोबाइल असा एकूण दोन लाख २४ हजार रुपयांचा मुद्देमाल लंपास केला होता.
शोधकामी यावलचे पोलिस निरीक्षक प्रदीप ठाकुर यांच्या मार्गदर्शनाखालील पोलिस उपनिरीक्षक सुनील मोरे, पोलिस उपनिरीक्षक मुजफ्फर खान पठाण व स्थानिक गुन्हे शाखेचे पोहेकों किरण धनगर यांच्यासह पोलिसांच्या पथकाने संशयित आरोपी रेवलसिंग उर्फ सावन गुलसिंग बारेला (वय २८, रा. जामन्या, ता. भगवानपुरा, जि. खरगोन) (ह. मु. अडावद ता. चोपडा) व मेगलासिंग उर्फ सेवकराम दलसिंग सोलंकी (वय ३०, राहणार बोकरान्या ता. भगवानपुरा) या दोघांना अडावद येथून ताब्यात घेतले आहे. या गुन्ह्यात आणखी काही आरोपींचा सहभाग आहे का? याचा शोध घेतला जात आहे
