जळगाव : प्रतिनिधी
शाहूनगर परिसरातील सहयोग हौसिंग सोसायटीमधील शिक्षण घेणाऱ्या विद्यार्थ्यांचे तब्बल १० मोबाइल चोरून नेल्याची धक्कादायक घटना रविवारी उघडकीस आली आहे. याप्रकरणी सोमवारी जळगाव शहर पोलिस ठाण्यात अज्ञात चोरट्यांविरोधात गुन्हा दाखल करण्यात आला आहे.
सविस्तर वृत्त असे कि, शाहूनगर येथील सहयोग हौसिंग सोसायटीत भूषण राजेंद्र ठाकरे (रा. वटार, ता. चोपडा) या तरुणासह इतर त्यांचे सहकारी मित्र वास्तव्याला आहेत. रविवारी पहाटे ५ वाजेच्या सुमारास घराचे दरवाजे उघडे ठेवून सर्वजण झोपलेले असताना अज्ञात चोरट्यांनी त्यांच्या खोलीतून भूषण ठाकरे यांच्यासह इतर विद्यार्थ्यांचे ७० हजार रूपये किमतीचे १० मोबाइल चोरून नेले. सकाळी हा प्रकार लक्षात आल्यानंतर सर्वांनी शोधाशोध केली. मात्र, कोणाचेही मोबाइल आढळून आले नाहीत. अखेर विद्यार्थ्यांनी सोमवारी सायंकाळी ६:३० वाजता जळगाव शहर पोलिस ठाण्यात धाव घेऊन तक्रार दिली आहे. त्यानुसार अज्ञात चोरट्यांविरोधात गुन्हा दाखल करण्यात आला. पुढील तपास सहायक फौजदार सुनील पाटील करीत आहेत
