यावल : प्रतिनिधी
तालुक्यातील सातपुड्याच्या कुशीत असलेल्या लंगडा आंबा येथे एका २३ वर्षीय तरुणावर पोलिसांचा खबरी असल्याचा आरोप करीत तेथीलच दोघांनी दारूच्या नशेत शिवीगाळ केली आणि तरुणाच्या आणि घराच्या दिशेने दगडफेक केली. यात तरुणास दुखापत झाली. याप्रकरणी यावल पोलिसांत दोनजणांविरुद्ध गुन्हा दाखल करण्यात आला आहे.
सविस्तर वृत्त असे कि, आदिवासी गावातील रहिवासी आमाशा गिला बारेला (वय २३) याच्या घरी दोघे जण आले. दारूच्या नशेत असलेल्या एकाने तरुणावर पोलिसांचा खबरी आहे, तुझ्यामुळे माझ्या वडिलांना पोलिसांनी पकडले, असा आरोप करीत शिवीगाळ केली आणि ठार मारण्याची धमकी दिली.
घराच्या दिशेने दगडफेक करून त्यांच्या घराचे नुकसान केले. तसेच फिर्यादीच्या दिशेने वीट मारून फेकल्याने त्यांच्या डोक्याला दुखापत झाली आहे. तेव्हा याप्रकरणी यावल पोलिस ठाण्यात आमाशा बारेला यांच्या फिर्यादीवरून दोघांविरुद्ध गुन्हा दाखल करण्यात आला आहे. याप्रकरणी पुढील तपास पोलिस नाईक वसीम तडवी करीत आहेत.
