भुसावळ : प्रतिनिधी
नशिराबादजवळ उड्डाणपूल परिसरात भुसावळहून जळगाव येथे येणाऱ्या दुचाकीचा भीषण अपघात झाला. या अपघातात भुसावळ येथील कामगार तरुण ठार झाला आहे. ही दुर्घटना १३ रोजी दुपारी घडली.
सविस्तर वृत्त असे कि, मडिया उर्फ मन्साराम भावसिंग बारेला (वय २४, रा. मलगाव जि. खरगोन, मध्य प्रदेश, ह.मु, भुसावळ) असे मयत तरुणाचे नाव आहे. तो भुसावळ येथे आई, वडील, पत्नी, दोन मुले यांच्यासह राहत होता. बांधकामांवर काम करून तो परिवाराचा उदरनिर्वाह करीत होता. मडियाची पत्नी ६ महिन्यांची गर्भवती आहे. काही दिवसांनी घरात बाळ येणार म्हणून त्याच्या घरात आनंदाचे वातावरण होते. मात्र या घटनेने सारेच सुन्न झाले.
शनिवार, दि. १३ एप्रिल रोजी मडिया हा दुचाकीने एकटाच भुसावळ येथून जळगाव येथे काही कामानिमित्त निघाला होता. दुपारी १२ वाजेच्या सुमारास नशिराबाद उड्डाणपुलाजवळ त्याचा भीषण अपघात झाला. या अपघातात तो गंभीर जखमी झाला. आजूबाजूच्या नागरिकांनी त्याला शासकीय वैद्यकीय महाविद्यालय व रुग्णालयात उपचारासाठी दाखल केले असता तेथे वैद्यकीय अधिकारी डॉ. स्नेहल दुगड यांनी तपासून त्यास मयत घोषित केले.
