धरणगाव : प्रतिनिधी
तालुक्यातील पिंप्री शिवारात दोन वाहनांच्या समोरासमोर झालेल्या अपघातात चार जण जखमी झाले आहेत. या प्रकरणी धरणगाव पोलिसात छत्रपती संभाजी नगर येथील एकाविरुद्ध गुन्हा दाखल करण्यात आला आहे.
मिळालेल्या माहितीनुसार, एरंडोलच्या माळी वाडड्यातील चालक लक्ष्मण मन्साराम महाजन (वय ३५) यांनी दिलेल्या फिर्यादीत म्हटले आहे की, ११ एप्रिल रोजी पहाटे साडेचार वाजेच्या सुमारास पिंप्री ते चिंचपुरा दरम्यान वळण रस्त्यावर छत्रपती संभाजी नगर जिल्ह्यातील सिल्लोड येथील जैनोहीन कॉलनीतील दादाराव बाबूराव अहिरे याने आपल्या ताब्यातील अशोक लेलन्ड कंपनीची गाडी (एमएच- २०, ईएल- ७११८) ने भरधाव वेगात विरुद्ध दिशेने येणाऱ्या महेंद्रा पीकअप गाडी (एमएच- १९, बीएम- ३४५९) ला समोरुन जबर धडक दिली. त्यामुळे गाडी उलटून झालेल्या अपघातात उमेश देविदास धामने व रावसाहेब एकनाथ चौधरी यांना किरकोळ मार लागला. तर समोरच्या वाहनातील अहिरेसह त्याच्या गाडीतील एक जण जखमी झाला आहे. या प्रकरणी दादाराव अहिरे याच्याविरुद्ध विविध कलमान्वये गुन्हा दाखल करण्यात आला आहे. तपास पोलीस निरीक्षक उद्धव ढमाले यांच्या मार्गदर्शनात स. फौ. राजेंद्र कोळी करत आहेत.
