जामनेर : प्रतिनिधी
तालुक्यातील पहूर पेठमधील रहिवासी राजू भीमराव बारी (दातीर) यांची कन्या दीपाली (२२) हिचा विहिरीत तोल जाऊन पडल्याने मृत्यू झाल्याची घटना घडली आहे. बारी परिवारावर ऐन सणाच्या दिवशी संकट कोसळल्याने शोककळा पसरली आहे.
सविस्तर वृत्त असे कि, दीपाली बारी व वडील राजू बारी (दातीर) दोघेही मंगळवारी सकाळी गोगडी देवळी शिवारातील शेतात गेले. दीपाली झाडाखाली बसली होती तर राजू बारी शेतात काम करीत होते. यादरम्यान दीपालीजवळच असलेल्या विहिरीजवळ गेली. याठिकाणी तिला भोवळ आल्याने तिचा तोल गेला व विहिरीत पडली.
राजू बारी यांच्या ही घटना लक्षात येताच विहिरीकडे त्यांनी धाव घेतली. दीपाली पाण्यात बुडाल्याचे निदर्शनास आले. घटनास्थळी आरडाओरड सुरू झाली. माहिती मिळताच नागरिकांनी धाव घेऊन मदतकार्य करून मृतदेह बाहेर काढला. पोलिस कर्मचारी विलास चव्हाण व अनिल राठोड यांनी धाव घेऊन पाहणी केली. घटनास्थळी पंचनामा केला. पहूर ग्रामीण रुग्णालयात शवविच्छेदन करून शोकाकुल वातावरणात अंत्यसंस्कार करण्यात आले. ऐन सणाच्या दिवशी बारी परिवारावर संकट ओढावल्याने गावात हळहळ व्यक्त केली जाते. पश्चात आई-वडील, भाऊ, आजोबा, आजी असा परिवार आहे.
