नशिराबाद पोलीसात अकस्मात मृत्यूची नोंद
जळगाव प्रतिनिधी । जळगाव तालुक्यातील नशिराबाद येथील २१ वर्षीय विवाहितेने राहत्या घरात गळफास घेवून आत्महत्या केल्याची घटना समोर आली आहे. आत्महत्या करण्यापुर्वी सुसाईड नोट लिहून ठेवली होती. याप्रकरणी नशिराबाद पोलीस ठाण्यात अकस्मात मृत्यूची नोंद करण्यात आली आहे.
समीना बानो शेख अफसर (वय-२१) रा. नशिराबाद ता.जि. जळगाव असे मयत तरूणीचे नाव आहे. याबाबत माहिती अशी की, समीना बानो ही आपल्या कुटुंबियांसह वास्तव्याला आहे. सोमवार ३ जानेवारी रोजी विवाहितेने राहत्या घरात कुणीही नसतांना छताला दोरीच्या सहाय्याने गळफास घेवून आत्महत्या केल्याचे सायंकाळी ५ वाजेच्या सुमारास उघडकीला आले. आत्महत्या करण्यापुर्वी सुसाईड नोट लिहून ठेवली होती. त्यात म्हटले आहे की, “माझ्याकडून सासूच्या आजारपणाची सेवा होवू शकत नसल्याने आत्महत्या करत आहे” असे नमूद केले आहे. घरातील सदस्य घरी आल्यावर हा प्रकार लक्षात आला. नातेवाईकांसह शेजारच्यांनी तातडीने जळगाव जिल्हा शासकीय वैद्यकीय महाविद्यालयात दाखल केले असता वैद्यकीय अधिकारी यांनी मयत घोषीत केले. याप्रकरणी नशिराबाद पोलीस ठाण्यात अकस्मात मृत्यूची नोंद करण्यात आली आहे. पुढील तपास पोलीस उपनिरीक्षक राजेंद्र साळुंखे करीत आहे.
