बोदवड : प्रतिनिधी
मुक्ताईनगर रस्त्यावरील नाडगाव शिवारात दुचाकी व ट्रॅक्टरची धडक झाली. दि. १ रोजी रात्री साडेनऊ वाजेच्या दरम्यान झालेल्या या अपघातात दुचाकीवरील श्रीकांत ऊर्फ बबलू वंजारी व राजेंद्र हरी खराटे (वय ३५, दोन्ही रा. वंजारीवाडा, बोदवड) हे गंभीर जखमी झाले.
सविस्तर वृत्त असे कि, नाडगाव येथील धनराज गायकवाड यांनी जखमींना ग्रामीण रुग्णालयात आणले. परंतु ग्रामीण रुग्णालयात असलेल्या १०२ व १०८ या दोन्ही रुग्णवाहिकांवर चालक नसल्याने जखमींना खासगी रुग्णवाहिकेतून भुसावळला उपचारासाठी हलविण्यात आले. १०२ क्रमांकाच्या रुग्णवाहिकेवर चालक असलेले सोपान राणे हे कर्तव्यावर असूनसुद्धा वेळेवर आले नाहीत. यामुळे नगराध्यक्ष आनंद पाटील यांच्यासह गावातील तरुण मोठ्या संख्येने रुग्णालयात आले होते व तणाव निर्माण झाला होता. कामात हलगर्जीपणा केल्याचा आरोप करीत या चालकावर कारवाईची मागणी यावेळी संतप्त झालेल्या जमावाने केली. घटनास्थळी सहायक पोलिस निरीक्षक अंकुश जाधव यांनी परिस्थिती नियंत्रणात आणली
