अमळनेर : प्रतिनिधी
चोपडा येथील प्रियकर व प्रेयसी अशा दोघांच्या खून प्रकरणी पाच आरोपींना अमळनेर सत्र न्यायालयाने जन्मठेप तर वकिलासह दोघांना पाच वर्षांची शिक्षा सुनावली आहे. अमळनेर येथील न्या. पी. आर. चौधरी यांनी सोमवारी हा निकाल दिला.
मिळालेल्या माहितीनुसार, राकेश संजय राजपूत (२२, रा. रामपुरा, चोपडा) व वर्षा समाधान कोळी (२०, रा. सुंदरगढी, चोपडा) अशी मृत प्रियकर आणि प्रेयसीची नावे आहेत. १२ ऑगस्ट २०२२ रोजी चोपडा येथे खुनाची घटना घडली होती. घटनेच्या दिवशी राकेश हा वर्षा हिला पळवून नेण्याचा प्रयत्न करत असताना परिसरातील काही जणांनी त्यांना मोटारसायकलने वराड रस्त्यावर नेले. तिथे एका अल्पवयीन मुलाने गावठी पिस्तूलने राकेशच्या डोक्यात गोळी घातली. राकेश तडफडत असताना या मुलाने प्रतिकार करणाऱ्या वर्षाचाही गळा दाबला आणि त्यातच तिचा मृत्यू झाला. या घटनेनंतर हा मुलगा स्वतःच पोलिस ठाण्यात हजर झाला होता.
अॅड. नितीन पाटील याने पुरावे नष्ट करण्याचा सल्ला दिला. रवींद्र कोळी याने जिवंत काडतुसे लपवली तर पवन माळी याने कपडे जाळून पुरावे नष्ट केले होते. ही बाब पोलिसांच्या चौकशीत उघड आली सरकारी वकील अॅड. किशोर बागुल यांनी तब्बल २१ साक्षीदार तपासले. वैद्यकीय अधिकारी आर. के. गढरी, मनोज पाटील, एका हॉटेलमधील सीसीटीव्ही फुटेज, आरोपी यांच्या आपसातील वकिलाशी संवाद याबाबतचे सीडीआर रिपोर्ट ग्राह्य धरत न्या. चौधरी यांनी ही शिक्षा ठोठावली. यात तुषार आनंदा कोळी (२३), भरत संजय रायसिंग (२२), बंटी उर्फ शांताराम अभिमन कोळी (१९), आनंदा आत्माराम कोळी (५६) आणि रवींद्र आनंदा कोळी (२०) या आरोपींना जन्मठेपेची शिक्षा झाली.
