अमळनेर : प्रतिनिधी
मध्य प्रदेशातून अमळनेरात विक्रीसाठी येणारा ९ लाख २० हजार रुपयांचा गुटखा पोलिसांनी जप्त केला आहे. शुक्रवारी सायंकाळी जळोदा शिवारात ही कारवाई करण्यात आली. यात धुळ्याच्या दोन जणांना अटक करण्यात आली आहे.
सविस्तर वृत्त असे कि, वाहनचालक छोटू रमेश भिल (३१) आणि क्लीनर सुनील आसाराम भिल (३०, दोन्ही रा. हॅकळवाडी, ता. धुळे) अशी अटक करण्यात आलेल्यांची नावे आहेत. मध्य प्रदेशातून एक पिकअप व्हॅनमधून अमळनेरात गुटखा येत असल्याची माहिती पोलिसांना मिळाली. त्यावरून पोलिस पथकाने जळोद गावाजवळ हातेडहून अमळनेरकडे जाणारे वाहन अडविले. चालकाकडे विचारपूस केली असता, त्याने मध्य प्रदेशातील एका शेतातून गुटख्याची वाहतूक करीत असल्याची माहिती दिली. या वाहनात ९ लाख २० हजार रुपयांचा गुटखा आढळला. हितेश बेहरे यांच्या फिर्यादीनुसार अमळनेर पोलिसांत गुन्हा दाखल झाला आहे. आरोपींना पाच दिवसांची पोलिस कोठडी सुनावण्यात आली आहे. उपविभागीय पोलिस अधिकारी सुनील नंदवाळकर, पोलिस निरीक्षक विकास देवरे यांच्या मार्गदर्शनाखाली सपोनि अजित सावळे, पोकों हितेश बेहरे, जयंत सपकाळे, गणेश पाटील, हर्षल पाटील, नीलेश मोरे, प्रमोद बागडे यांनी ही कारवाई केली.
