जळगाव : प्रतिनिधी
ट्रेडिंगमध्ये पैसे गुंतवण्यास सांगून महिलेसह तिचा पती, सासू, नणंद यांच्या बँक खात्यावरून वेळोवेळी रक्कम स्वीकारत तब्बल एक कोटी पाच लाख २३ हजार ३४१ रुपयांमध्ये सोनल भीमराव उपलवार (३४, रा. हरेश्वरनगर) यांची ऑनलाइन फसवणूक करण्यात आली. याप्रकरणी चारजणांविरुद्ध सायबर पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, जळगावातील हरेश्वरनगरमधील रहिवासी असलेल्या सोनल उपलवार यांचा व्हॉटस् अॅप क्रमांक एका ग्रुपमध्ये जोडून तीनजणांनी व्हॉट्सअॅपद्वारे मेसेज करत ट्रेडिंगमध्ये गुंतवणूक करण्यास सांगितले. दि. १६ फेब्रुवारी ते २८ मार्च यादरम्यान सोनल यांच्यासह त्यांचे पती, नणंद, सासू यांच्या नावावरील बँक खात्यातून वेळोवेळी एकूण एक कोटी पाच लाख २३ हजार ३४१ रुपये स्वीकारले.
