धरणगाव : प्रतिनिधी
सुखनाथ महाराजांचा दर्शन घेवून परतणाऱ्यांच्या दुचाकीला समोरुन भरधाव वेगाने जाणाऱ्या ट्रकने जोरदार धडक दिल्याची घटना मंगळवारी सकाळी ११ वाजता धरणाव चोपडा रस्त्यावर घडली. या अपघातात युवराज काशिनाथ महाजन (वय ५०, रा. विखरण, ता. एरंडोल) यांचा जागीच मृत्यू झाला. त्यांच्यासोबत असलेले मच्छिंद्र सिताराम पाटील (वय ५०, रा. विखरण) हे गंभीर जखमी झालेल्यांचा उपचारादरम्यान, मृत्यू झाला. याप्रकरणी पोलिसात गुन्हा दाखल करण्यात आला आहे.
मिळालेल्या माहितीनुसार, चोपडा तालुक्यातील वर्डी येथे सुखनाथ महाराजांचा भंडार असल्याने एरंडोल तालुक्यातील विखरण येथील युवराज महाजन व मच्छिंद्र पाटील हे (एमएच १९, ४४९०) क्रमांकाच्या दुचाकीने गेले होते. कार्यक्रम आटोपून ते माघारी येत असतांना धरणगाव चोपडा रस्त्यावरील जी.एस.ट्रेडिंगजवळ अज्ञात ट्रकने त्यांच्या दुचाकीला जोरदार धडक दिली. या अपघातात युवराज महाजन यांचा जागीच मृत्यू झाला तर त्यांच्यासोबत असलेले मच्छिंद्र पाटील हे गंभीर जखमी झाले. अपघाताची माहिती मिळताच माजी नगराध्यक्ष निलेश चौधरी, गोपाल पाटील अमोल चौधरी, गौतम सोनवणे, विनोद रोकडे, गजानन महाजन यांनी घटनास्थळी धाव घेत जखमी मच्छिंद्र पाटील यांना तात्काळ उपचारार्थ धरणगाव ग्रामीण रुग्णालयात दाखल केले. त्यांच्यावर उपचार सुरु असतांना त्यांची प्राणज्योत मालवली. अपघातानंतर ट्रक चालक वाहनासह पसार झाला होता.
अपघात झाल्यानंतर विठ्ठल तुळशीराम महाजन धरणगाव पोलिसात तक्रार दिली. त्यानुसार ट्रक चालकाविरुद्ध गुन्हा दाखल करण्यात आला आहे. पुढील तपास पीएसआय करीम सैय्यद हे करीत आहे.
