जळगाव : प्रतिनिधी
पती व सासरे धार्मिक कार्यक्रमासाठी बाहेरगावी गेले असताना, घरी असलेल्या जयश्री अमित महाजन (२३, रा. नशिराबाद) या विवाहितेने गळफास घेऊन आत्महत्या केली. ही घटना सोमवार, २५ मार्च रोजी नशिराबाद येथे घडली. तीन वर्षाच्या बालिकेच्या रडण्याचा आवाज आल्यामुळे ही घटना उघडकीस आली.
मिळालेल्या माहितीनुसार, खासगी व्यवसाय करणारे अमित महाजन हे त्यांच्या वडिलांसह एका धार्मिक कार्यक्रमासाठी मुक्ताईनगर तालुक्यातील चांगदेव येथे गेले होते. त्यामुळे जयश्री या तीन वर्षीय मुलीसह घरी होत्या. गल्लीतील मुले धूलिवंदन साजरे करत असताना, जयश्री महाजन यांनी घरात गळफास घेत आत्महत्या केली. त्यांच्या तीन वर्षांच्या मुलीचा रडायचा आवाज आल्याने शेजारील मंडळींनी घरात पाहिले असता, विवाहितेने गळफास घेतल्याचे दिसले.
विवाहितेला शासकीय वैद्यकीय महाविद्यालय व रुग्णालयात दाखल केले असता, डॉक्टरांनी मयत घोषित केले. या प्रकरणी नशिराबाद पोलिस ठाण्यात आकस्मिक मृत्यूची नोंद करण्यात आली आहे. मयत जयश्री महाजन यांच्या पश्चात पती, लहान मुलगी, सासरे असा परिवार आहे. विवाहितेच्या मृत्यूने तीन वर्षीय बालिकेचे मातृछत्र हरवले आहे
