जळगाव : प्रतिनिधी
शहरातील गेंदालाल मिल परिसरात दि.१९ मार्च मंगळवार रोजी पतीसोबत प्रेमसंबंध असल्याच्या संशयावरून दोन महिलांमध्ये हाणामारी झाली. या प्रकरणी परस्परविरोधी तक्रारीवरून शहर पोलिस ठाण्यात गुन्हे दाखल करण्यात आले आहेत.
मिळालेल्या माहितीनुसार, गेंदालाल मिल परिसरात राहणाऱ्या एका महिलेच्या पतीचे त्याच परिसरातील एका महिलेसोबत प्रेमसंबंध असल्याचा संशय असल्याने तिने व तिच्या मुलीने महिलेला मारहाण केली. त्यावेळी शेजारील एक महिला तेथे भांडण सोडविण्यासाठी आली असता, तिलाही मारहाण करण्यात आली.
मारहाण करणाऱ्या दोघींविरुद्ध शहर पोलिस ठाण्यात फिर्याद दिली. त्यावरून गुन्हा दाखल करण्यात आला. या सोबतच संबंधित पतीच्या पत्नीनेही शहर पोलिस ठाण्यात फिर्याद दिली. त्यावरून प्रेमसंबंधाचा संशय असलेल्या महिलेविरुद्ध शहर पोलिस ठाण्यात गुन्हा दाखल करण्यात आला आहे. पुढील तपास पोहेकॉ. रवींद्र सोनार करीत आहेत.
