अमळनेर : प्रतिनिधी
तालुक्यातील कुन्हे बुद्रुक येथे जागा खाली करण्याच्या वादावरून एकाला लोखंडी रॉड व चाकूने मारहाण करून जखमी केल्याची घटना २३ फेब्रुवारी रोजी सायंकाळी साडेसहा वाजता घडली होती. जखमी दवाखान्यात उपचार घेऊन आल्यावर फिर्याद दिल्याने अमळनेर पोलिस स्टेशनला उशिराने चार जणांवर गुन्हा नोंदविण्यात आला आहे.
मिळालेल्या माहितीनुसार, प्रदीप रामसिंग पाटील यांनी हे आपल्या घरासमोर अंगणात उभा असताना शेजारी राहणारे नाना गुलाब पाटील, मालूबाई नाना पाटील आले व त्यांनी जागा खाली करून का देत नाही असे विचारू लागले. प्रदीप यांनी उताऱ्यावरील जागा मोजून घ्या, असे सांगताच त्यांना राग येऊन त्यांनी प्रदीप व त्याची पत्नी याना शिवीगाळ व लाथाबुक्क्यांनी मारहाण केली. नंतर त्यांनी प्रेमसिंग पाटील यांना बोलावून घेतले. त्यांचा मुलगा नीलेश पाटील हा शेतातून आल्यावर त्याने प्रदीप यांच्या डोक्यावर लोखंडी रॉडने कपाळावर मारहाण करून दुखापत केली. प्रेमसिंग पाटील याने प्रदीप यांच्या उजव्या हातावर चाकूने वार केला. प्रदीप यांना गावकऱ्यांनी उपचारासाठी दवाखान्यात दाखल केले, तेव्हा नीलेश याने प्रदीप यांच्या सासू लीलाबाई संतोष पाटील यांच्या घरी जाऊन त्यांनाही मारहाण केली. प्रदीप यांनी दवाखान्यातून उपचार घेऊन परतल्यावर अमळनेर पोलिस स्टेशनला नीलेश, प्रेमसिंग, मालूबाई, नाना पाटील या चौघांविरुद्ध फिर्याद दिली आहे.
