एरंडोल : प्रतिनिधी
खडके सिम येथे दुचाकीने परत जात असताना, रस्त्याच्या कडेला उभ्या असलेल्या नादुरुस्त ट्रॅक्टरला दुचाकीने धडक दिल्याची घटना शुक्रवारी रात्री आठ वाजण्याच्या सुमारास कासोदार रस्त्यावर घडली. त्यात जखमी दुचाकीस्वार प्रणय जितेंद्र पाटील (२३, खडके सिम) या तरुणाचा उपचारादरम्यान शनिवारी मृत्यू झाला.
मिळालेल्या माहितीनुसार, प्रणय हा जळगाव येथे रायसोनी महाविद्यालयात बी.टेकला शेवटच्या वर्षाला शिकत होता. तो एरंडोल येथे व्यायामशाळेत व्यायामाला आला होता. घरी परत जात असताना काळाने त्याच्यावर घाला घातला. प्रणय हा दुचाकीने (एमएच१९/इजे२४३८) एरंडोल येथून खडकेसिम येथे कासोदा रस्त्याने घरी परत जात होता.
कुंदन परदेशी यांच्या शेताजवळ रस्त्याच्या कडेला नादुरुस्त ट्रॅक्टर (एमएच१९/बीजी५१७०) उभा होते. त्यास रिफ्लेक्टर, इंडिकेटर लावलेले नव्हते, तसेच कोणत्याही सुरक्षिततेची दखल न घेतल्याने दुचाकी ट्रॅक्टरवर जाऊन आदळली. अपघातात जखमी प्रणय याचा औषधोपचाराच्या दरम्यान मृत्यू झाला. या प्रकरणी एरंडोल पोलिस स्टेशनला गुन्हा दाखल करण्यात आला असून, पुढील तपास सहायक फौजदार देशमुख, अनिल पाटील, अखिल मुजावर, मिलिंद कुमावत हे तपास करीत आहेत.
