जळगाव : प्रतिनिधी
जळगाव जिल्ह्यातील अनेक ठिकाणी अपघाताच्या घटना घडत असतांना अशाच एक अपघातात भाजपाचे जिल्हाध्यक्ष ज्ञानेश्वर जळकेकर महाराज यांच्या वाहनाचा (एमएच १८ एजे २५२६) मोठा अपघात दि.१३ रोजी बुधवारी पहाटे ३:३० वाजेच्या सुमारास वीटनेर- पळासखेडा रस्त्यावर झाल्याची धक्कादायक घटना घडली. या अपघातात जिल्हाध्यक्ष ज्ञानेश्वर महाराज जळकेकर व त्यांचे चालक आनंदा नेवे यांना दुखापत झाली आहे.
मिळालेल्या माहितीनुसार, नगर जिल्ह्यातील एका ठिकाणी ज्ञानेश्वर जळकेकर हे मंगळवारी कीर्तनाच्या कार्यक्रमाला गेले होते. कीर्तनाचा कार्यक्रम आटोपून रात्री आपल्या गावाकडे परत येत असताना, पहाटे ३:३० वाजेच्या सुमारास चालक आनंदा नेवे यांना डुलकी लागल्याने वाहनाचा ताबा सुटला, नियंत्रण सुटलेले वाहन रस्त्याच्या पलीकडे धडकले. सुदैवाने वाहन धडकल्यानंतर कारमधील सर्व एअर बॅग उघडल्यामुळे दोघांनाही गंभीर स्वरूपाची दुखापत झाली नाही. मात्र, या अपघातात वाहनाचे मोठे नुकसान झाले. रात्री अपघात झाल्यानंतर परिसरातील काही शेतकरी, शेतातून पाणी भरून येत असताना त्यांच्या लक्षात आल्यानंतर तातडीने दोन्ही जखमींना रुग्णालयात उपचारासाठी दाखल करण्यात आले. ज्ञानेश्वर महाराज जळकेकर यांच्या खांद्याला दुखापत झाली आहे. तर ड्रायव्हर आनंदा नेवे यांना मुका मार लागला आहे. त्यांच्यावर खासगी रुग्णालयात उपचार सुरू आहेत.
