जळगाव : प्रतिनिधी
एमआयडीसीतील व्ही- सेक्टरमधील दालमिल कंपनीत काम करताना सरस्वती गोविंदा ठाकरे (वय- ३५, रा. सुहागी ता.खालवा जि. खंडवा ह.मु. जळगाव) या मजूर महिलेचा स्कार्फ मशीनच्या पट्ट्यात अडकल्याने गळफास लागून मृत्यू झाल्याची घटना मंगळवारी दुपारी २ वाजेच्या सुमारास घडली. याबाबत एमआयडीसी पोलिसात अकस्मात मृत्यूची नोंद करण्यात आली आहे.
मिळालेल्या माहितीनुसार, विवाहिता पती गोविंदा नानू ठाकरे आणि तीन मुलांसह एमआयडीसीतील मुकेश अॅग्रो इंडस्ट्रीज या दालमिल कंपनीत गेल्या दोन वर्षांपासून काम करत असून तेथेच वास्तव्याला होत्या. नेहमीप्रमाणे मंगळवारी रोजी दुपारी २ वाजता जेवण झाल्यानंतर सरस्वती ठाकरे या कंपनीत कामावर हजर झाल्या, त्यावेळी मशीनमध्ये डाळ टाकत असताना त्यांच्या गळ्यात बांधलेला स्कार्फ हा मशीनच्या पट्ट्यात अडकला. त्यामुळे त्यांना गळ्याला फास बसला. हा फास एवढा घट्ट होता की, महिलेचे मुंडके धडापासून वेगळे झाले. त्यामुळे त्यांचा जागीच मृत्यू झाला. ही घटना झाल्यानंतर परिसरात खळबळ उडाली. या घटनेची माहिती एमआयडीसी पोलिसांना कळविण्यात आली. एमआयडीसी पोलीस ठाण्याचे पोलीस उपनिरीक्षक रविंद्र गिरासे, बीट हवालदार ललित नारखेडे यांनी घटनास्थळी धाव घेऊन मृतदेहाचा पंचनामा केला. त्यांचे पार्थिव शासकीय वैद्यकीय महाविद्यालयात दाखल करण्यात आले. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आले आहे. मयत महिलेच्या पश्चात पती दोन मुली, एक मुलगा असा परिवार आहे.
