जळगाव : प्रतिनिधी
खेडी परिसरातील बसथांब्याजवळ हातात लोखंडी सुरा घेऊन, दहशत माजविणाऱ्याच्या मुसक्या एमआयडीसी पोलिसांनी आवळल्या आहेत. कमलेश प्रकाश सपकाळे (वय २१, रा. हरिओमनगर) असे पोलिसांनी ताब्यात घेतलेल्याचे नाव आहे.
मिळालेल्या माहितीनुसार, ७ मार्च रोजी रात्री ८:३० वाजेच्या सुमारास कमलेश सपकाळे हा खेडी परिसरातील बसथांब्याजवळ हातात लोखंडी सुरा घेऊन दहशत माजवित असल्याची माहिती पोलिस निरीक्षक बबन आव्हाड यांना मिळाली. त्यानुसार एमआयडीसी पोलिसांच्या पथकाने कमलेशला ताब्यात घेतले. त्याच्याकडून एक लोखंडी सुरा जप्त करण्यात आला आहे. पोलिस उपनिरीक्षक दत्तात्रय पोटे, अतुल वंजारी, विकास सातदिवे, नितीन ठाकूर, मुकेश पाटील, सिध्देश्वर डापकर, विजय कोळी, साई मुंडे यांनी ही कारवाई केली.
