बोदवड : प्रतिनिधी
सोशल मीडिया हे प्रसार- प्रचार करण्याचे तसेच प्रसिद्धीच्या झोतात येण्याचे जलद साधन आहे. परंतु हे साधन काही वेळेस नुकसानदायी देखील ठरत आहे. येथील एका महिलेचे खाते हॅक करून अश्लील पोस्ट यामार्फत टाकल्याचा प्रकार समोर आला आहे.
मिळालेल्या माहितीनुसार, शहरातील एका मध्यमवर्गीय महिलेचे सोशल मीडियावर खाते आहे. हे खाते एकाने हॅक करत त्यावर अश्लील संदेश व पोस्ट टाकली आणि याच महिलेच्या नावाने मित्र जोडण्याचे संदेश प्रसारित होऊ लागले. ही बाब या महिलेच्या लक्षात आली असता, तिने याबाबत सायबर सेल गुन्हे शाखा जळगावकडे तक्रार नोंदवली आहे. यानंतर हे खाते बंद करण्यात आले आहे. मात्र यामुळे नाहक या महिलेला त्रास सहन करावा लागला. सोशल मीडियावर नागरिकांनी सावधपणा बाळगावा. चुकीचे काही आढळल्यास तातडीने पोलिसांशी संपर्क साधावा, असे आवाहनही पोलिसांनी केले आहे.
